महाराष्ट्राचा विश्वविक्रम! ‘मागेल त्याला सौर कृषिपंप’ योजनेची गिनीज बुकमध्ये नोंद; मुख्यमंत्र्यांच्या हस्ते उद्या प्रमाणपत्र प्रदान

मुंबई: महाराष्ट्राने ‘मागेल त्याला सौर कृषिपंप’ योजनेच्या अंमलबजावणीत विक्रमी कामगिरी करत थेट गिनीज बुक ऑफ वर्ल्ड रेकॉर्ड्समध्ये नोंद केली आहे. महावितरणने एकाच महिन्यात तब्बल ४५ हजार ९११ सौर कृषिपंप स्थापित करण्याचा हा ऐतिहासिक उच्चांक गाठला आहे. या विश्वविक्रमाचे प्रमाणपत्र प्रदान करण्याचा सोहळा उद्या, शुक्रवार, ५ डिसेंबर २०२५ रोजी सकाळी १० वाजता, मुख्यमंत्री देवेंद्र फडणवीस यांच्या प्रमुख उपस्थितीत छत्रपती संभाजीनगर येथील शेंद्रा एमआयडीसीमधील ऑरिक सिटी मैदानावर आयोजित करण्यात आला आहे.

या महत्त्वपूर्ण सोहळ्याला उपमुख्यमंत्री एकनाथ शिंदे, उपमुख्यमंत्री अजित पवार, अपारंपरिक ऊर्जामंत्री अतुल सावे, छत्रपती संभाजीनगरचे पालकमंत्री संजय शिरसाट, ऊर्जा राज्यमंत्री श्रीमती मेघना साकोरे-बोर्डीकर, ऊर्जा विभागाच्या अपर मुख्य सचिव आभा शुक्ला आणि महावितरणचे अध्यक्ष व व्यवस्थापकीय संचालक लोकेश चंद्र यांच्यासह अनेक मान्यवर उपस्थित राहणार आहेत.

शेतकऱ्यांसाठी योजना आणि उद्दिष्ट:

‘मागेल त्याला सौर कृषिपंप’ ही योजना शेतकऱ्यांसाठी अत्यंत फायदेशीर ठरली आहे. प्रधानमंत्री कुसुम योजनेच्या अंतर्गत केंद्र सरकारकडून ३० टक्के आणि राज्य सरकारकडून ६० टक्के अनुदान मिळत असल्याने, शेतकऱ्याला केवळ १० टक्के रक्कम भरून सौर पॅनेल्ससह संपूर्ण कृषिपंप संच मिळतो. अनुसूचित जाती आणि जमातीच्या शेतकऱ्यांसाठी तर हा हिस्सा केवळ ५ टक्के ठेवण्यात आला आहे.

राज्यात एकूण साडेदहा लाख सौर कृषिपंप बसविण्याचे महत्त्वाकांक्षी उद्दिष्ट ठेवण्यात आले आहे. या योजनेमुळे वीज जोडणीसाठी पैसे भरून प्रतीक्षेत असलेल्या सर्व शेतकऱ्यांच्या ‘पेड पेंडिंग’चा प्रश्न कायमस्वरूपी सुटणार आहे.
योजनेची अंमलबजावणी:

महावितरणने या योजनेसाठी स्वतंत्र पोर्टल तयार केले असून शेतकऱ्याने ऑनलाईन नोंदणी केल्यानंतर तसेच त्याचा अर्ज मंजूर झाल्यावर तो आपला हिस्सा भरू शकतो. त्यानंतर महावितरण, एजन्सी आणि शेतकरी यांच्या संयुक्त पाहणीनंतर शेतात पंप बसविला जातो. सौर पॅनेल्समधून २५ वर्षे वीजनिर्मिती होत असल्याने शेतकऱ्यांचे वीज बिल पूर्णपणे वाचते. शिवाय पारंपरिक वीजपुरवठ्यावर अवलंबून न राहता, शेतकऱ्यांना त्यांच्या सोयीनुसार दिवसा कधीही सिंचन करण्याची सुविधा उपलब्ध होते.