भीम आर्मीचा भव्य मोर्चा: अनंत बदर समितीचा अहवाल रद्द करण्याची आणि उपवर्गीकरण प्रक्रियेस स्थगितीची मागणी

अनंत बदर समितीचा अहवाल रद्द करा; अनुसूचित जाती उपवर्गीकरण प्रक्रियेस तात्काळ स्थगिती द्या – भीम आर्मी

मुंबई, दि. ४ जून २०२६ : अनुसूचित जाती आरक्षणातील उपवर्गीकरणाच्या विरोधात आज भीम आर्मीच्या वतीने छत्रपती शिवाजी महाराज टर्मिनस (CSTM) ते मंत्रालय असा भव्य मोर्चा काढण्यात आला. या मोर्चाद्वारे महाराष्ट्र शासनाने नियुक्त केलेल्या न्यायमूर्ती अनंत बदर समितीचा अहवाल रद्द करण्यात यावा तसेच उपवर्गीकरण प्रक्रियेस तात्काळ स्थगिती द्यावी, अशी मागणी करण्यात आली.

भीम आर्मीने शासनाला दिलेल्या निवेदनात नमूद केले आहे की, महाराष्ट्रातील ५९ अनुसूचित जातींपैकी एकाही जातीचा प्रतिनिधी समितीत समाविष्ट नाही. तसेच कोणतीही व्यापक सार्वजनिक सुनावणी, हरकती किंवा सल्लामसलत न घेता अहवाल तयार करण्यात आल्याने नैसर्गिक न्यायाच्या तत्त्वांचे उल्लंघन झाल्याचा आरोप करण्यात आला आहे.

समितीचा अहवाल, अनुभवजन्य माहिती (Empirical Data), कार्यपद्धती आणि शिफारसी अद्याप सार्वजनिक न केल्यामुळे ही संपूर्ण प्रक्रिया अपारदर्शक असल्याचेही निवेदनात म्हटले आहे. सर्वोच्च न्यायालयाने उपवर्गीकरणाबाबत दिलेल्या घटनात्मक मार्गदर्शक तत्त्वांचे पालन न करता शासन घाईघाईने पुढील कार्यवाही करत असल्याचा आरोपही करण्यात आला आहे.

मोर्चानंतर भीम आर्मीच्या शिष्टमंडळाने मंत्रालयात मुख्यमंत्री यांचे OSD श्री. पाटणकर यांची भेट घेऊन निवेदन सादर केले. यावेळी त्यांनी या विषयाची गंभीर दखल घेण्यात येईल आणि लवकरच मुख्यमंत्री महोदयांसोबत भीम आर्मीची बैठक आयोजित केली जाईल, असे आश्वासन दिल्याचे सांगण्यात आले.

भीम आर्मीच्या प्रमुख मागण्या :
• न्यायमूर्ती अनंत बदर समितीचा अहवाल तात्काळ रद्द करण्यात यावा
• अनुसूचित जाती उपवर्गीकरण प्रक्रिया तात्काळ स्थगित करण्यात यावी
• समितीचा संपूर्ण अहवाल व अनुभवजन्य माहिती सार्वजनिक करण्यात यावी
• सर्व ५९ अनुसूचित जाती, सामाजिक संघटना व तज्ज्ञांशी व्यापक सल्लामसलत करण्यात यावी
• सर्वोच्च न्यायालयाच्या मार्गदर्शक तत्त्वांचे पालन झाल्याशिवाय पुढील कार्यवाही करू नये

अशोक कांबळे
प्रदेश अध्यक्ष, भीम आर्मी महाराष्ट्र
मो. 7678018318