गोरेगावच्या न्यू म्हाडा आणि नागरी निवारा वसाहतीत बिबट्याची पुन्हा दहशत

गोरेगावच्या नागरी वस्तीत बिबट्याची दहशत; वनविभाग पिंजरे व कॅमेरे लावणार

आमदार सुनील प्रभू यांनी वनविभाग व स्थानिक नागरिकांसोबत केली पाहणी

मुंबई (प्रतिनिधी) : दिंडोशी विधानसभा मतदारसंघातील नवीन म्हाडा वसाहत आणि नागरी निवारा वसाहत परिसरात सलग दोन दिवस बिबट्याचा वावर आढळल्याने नागरिकांमध्ये भीतीचे वातावरण निर्माण झाले आहे. नागरी निवारा परिषद प्लॉट क्रमांक ५/१ मधील इमारतीपर्यंत बिबट्या पोहोचल्याचे निदर्शनास आले आहे. या पार्श्वभूमीवर वनविभागाने संबंधित परिसरात पिंजरे आणि सीसीटीव्ही कॅमेरे बसविण्याचा निर्णय घेतला आहे.

नवीन म्हाडा वसाहत आणि नागरी निवारा प्लॉट क्रमांक ५ परिसरात बिबट्याचा वावर दिसत असल्याचा व्हिडिओ समोर आल्यानंतर नागरिकांमध्ये चिंतेचे वातावरण पसरले. या घटनेची माहिती मिळताच दिंडोशी विधानसभा मतदारसंघाचे आमदार सुनील प्रभू यांनी सोमवारी रात्री सुमारे ८.३० वाजता परिसराला भेट देऊन परिस्थितीची पाहणी केली.

यावेळी त्यांनी बिबट्याच्या हालचालींचे व्हिडिओ पाहून स्थानिक सोसायटी पदाधिकाऱ्यांशी चर्चा केली. परिसरातील संरक्षक भिंतींवर तारेचे कुंपण उभारण्याची सूचनाही त्यांनी केली. तसेच वनरक्षक अधिकारी योगेश महाजन यांच्याशी संवाद साधून भविष्यातील उपाययोजनांबाबत माहिती घेतली. त्यावर महाजन यांनी बिबट्या ज्या मार्गाने परिसरात प्रवेश करतो, त्या ठिकाणी तातडीने पिंजरे व सीसीटीव्ही कॅमेरे बसविण्यात येतील, असे सांगितले.

आमदार सुनील प्रभू यांनी नागरिकांना सावधगिरी बाळगण्याचे आवाहन करताना पहाटे जॉगिंगसाठी किंवा रात्री उशिरा बाहेर पडताना विशेष काळजी घेण्यास सांगितले. ज्येष्ठ नागरिक, लहान मुले आणि तरुणांनीही सतर्क राहावे, असे त्यांनी नमूद केले.

या पाहणी दौऱ्यात कृष्णागिरी उपवनचे अधिकारी, वनपाल सुधीर ढेंबरे, वनरक्षक लक्ष्मण टिकेकर, नंदकिशोर सोळंकी, हनुमंत वाडीकर, रेस्क्यू टीम, एमएसएफ कर्मचारी तसेच शिवसेना नगरसेवक सुहास वाडकर, स्थानिक नगरसेवक तुळशीराम शिंदे आणि इतर पदाधिकारी उपस्थित होते.

पथकाने बिबट्या कोणत्या मार्गाने परिसरात प्रवेश करतो याची पाहणी केली. त्या मार्गांवर पिंजरे बसविणे, नागरिकांच्या सुरक्षेसाठी वनविभागाचे विशेष पथक तैनात करणे आणि आवश्यक प्रतिबंधात्मक उपाययोजना राबविणे याबाबत चर्चा करण्यात आली. यावेळी स्थानिक शाखाप्रमुख संदीप जाधव, संपत मोरे, कार्यालय प्रमुख दीपक बिर्हाडे तसेच अनेक स्थानिक रहिवासी उपस्थित होते.