मालाडमध्ये जागतिक दर्जाचे ‘एकात्मिक चित्रपट व दूरदर्शन मीडिया हब’ उभारण्यासाठी विशेष उद्देश कंपनी स्थापन होणार – मुख्यमंत्री देवेंद्र फडणवीस

मुंबई, दि. ३ : मुंबईतील मालाड येथे आकाशवाणी (प्रसार भारती)च्या जागेवर जागतिक दर्जाचे ‘एकात्मिक चित्रपट आणि दूरदर्शन मीडिया हब’ उभारण्यासाठी महाराष्ट्र शासन आणि प्रसार भारती यांच्या संयुक्त विद्यमाने विशेष उद्देश कंपनी (SPV) स्थापन करण्यास मुख्यमंत्री देवेंद्र फडणवीस यांनी आज मान्यता दिली.

प्रसार भारतीसोबत करण्यात आलेल्या सामंजस्य कराराच्या अंमलबजावणीसंदर्भात मुख्यमंत्री फडणवीस यांच्या अध्यक्षतेखाली वर्षा शासकीय निवासस्थानी आढावा बैठक आयोजित करण्यात आली होती. बैठकीस सांस्कृतिक कार्य मंत्री ॲड. आशिष शेलार, प्रसार भारतीचे मुख्य कार्यकारी अधिकारी गौरव द्विवेदी तसेच महाराष्ट्र चित्रपट, रंगभूमी आणि सांस्कृतिक विकास महामंडळ व एमआयडीसीचे वरिष्ठ अधिकारी उपस्थित होते.

यावेळी मुख्यमंत्री फडणवीस यांनी सांगितले की, मालाड येथील जागेवर सध्या एनडीझेड (No Development Zone) आणि सीआरझेड (Coastal Regulation Zone) नियम लागू असल्यामुळे मर्यादित क्षेत्रातच विकास शक्य आहे. संपूर्ण प्रकल्पाची प्रभावी अंमलबजावणी करण्यासाठी आवश्यक वैधानिक परवानग्या, नियामक बदल आणि विकास नियंत्रण नियमावलीतील सुधारणा कराव्या लागतील. या प्रक्रियेसाठी राज्य शासनाकडून सर्व आवश्यक सहकार्य दिले जाईल, असे त्यांनी स्पष्ट केले.

प्रकल्पाच्या अंमलबजावणीला गती देण्यासाठी पूर्व-व्यवहार्यता अहवाल (Pre-Feasibility Study), सविस्तर प्रकल्प अहवाल (DPR) आणि कृती आराखडा तयार करण्यासाठी तज्ज्ञ सल्लागार संस्थेची नियुक्ती करण्यात यावी, असे निर्देशही मुख्यमंत्र्यांनी दिले. तसेच तांत्रिक आणि प्रशासकीय प्रक्रियांचा समन्वय साधण्यासाठी महाराष्ट्र शासन आणि प्रसार भारतीच्या अधिकाऱ्यांची संयुक्त कार्यसमिती स्थापन करण्याच्या सूचनाही त्यांनी केल्या.

जून महिन्याच्या अखेरीपर्यंत प्रकल्पातील सर्व घटक, विकास आराखडा आणि पुढील कार्यवाहीचा अंतिम आराखडा निश्चित करण्याचे निर्देशही यावेळी देण्यात आले.

मालाड येथील प्रसार भारतीच्या एकूण २७८ एकर जागेपैकी सुमारे १५० एकर क्षेत्रावर चित्रपट नगरीसोबत संयुक्त विकास प्रस्तावित आहे. या महत्त्वाकांक्षी प्रकल्पासाठी प्रसार भारती, एमआयडीसी आणि महाराष्ट्र चित्रपट, रंगभूमी व सांस्कृतिक विकास महामंडळ यांच्यात यापूर्वी सामंजस्य करार करण्यात आला आहे.

आकाशवाणीचे बहुतांश प्रसारण एफएम तंत्रज्ञानावर स्थलांतरित होत असल्याने उपलब्ध जागेचा प्रभावी वापर करून महाराष्ट्राला जागतिक दर्जाचे मीडिया, मनोरंजन आणि सर्जनशील उद्योग केंद्र म्हणून विकसित करण्याचा शासनाचा मानस आहे.

प्रस्तावित मीडिया हबमध्ये अत्याधुनिक चित्रपट स्टुडिओ, साऊंड स्टेजेस, पोस्ट-प्रॉडक्शन सुविधा, हॉस्पिटॅलिटी प्रकल्प, आयटी आणि आयटीईएस क्षेत्राशी संबंधित अधोसंरचना, पर्यटन विकास प्रकल्प तसेच आंतरराष्ट्रीय दर्जाची चित्रपट व संगीत प्रशिक्षण केंद्रे उभारण्यात येणार आहेत. यासाठी परदेशातील नामांकित शैक्षणिक आणि प्रशिक्षण संस्थांशी सहकार्य करण्याचीही योजना आहे.

हा प्रकल्प महाराष्ट्राच्या मीडिया, मनोरंजन आणि सर्जनशील अर्थव्यवस्थेला नवी दिशा देणारा ठरेल तसेच रोजगारनिर्मिती, गुंतवणूक आणि कौशल्य विकासाला मोठी चालना मिळवून देईल, असा विश्वास यावेळी व्यक्त करण्यात आला.