शुक्ला कंपाऊंड रहिवाशांना न्याय मिळवून दिल्याबद्दल माजी खासदार गोपाळ शेट्टी यांचा सत्कार
मुंबई, दि. (प्रतिनिधी): दहिसर येथील शुक्ला कंपाऊंडमधील रहिवाशांना बेघर होण्यापासून वाचवून त्यांना न्याय मिळवून दिल्याबद्दल माजी खासदार गोपाळ शेट्टी यांचा सन्मान करण्यात आला. हा सत्कार दहिसरच्या आमदार मनीषा चौधरी यांच्या हस्ते करण्यात आला.
शुक्ला कंपाऊंड परिसरात विकासकाच्या माध्यमातून गाळेधारक आणि झोपडीधारकांना निष्कासित करून बेघर करण्याचा प्रयत्न झाल्याचा आरोप करण्यात आला होता. या पार्श्वभूमीवर माजी खासदार गोपाळ शेट्टी यांनी स्थानिक रहिवाशांच्या बाजूने ठाम भूमिका घेतली. त्यांनी नागरिकांच्या हक्कांसाठी आंदोलन केले, संबंधित यंत्रणांशी बैठका घेतल्या तसेच न्यायालयीन लढाई लढून रहिवाशांना न्याय मिळवून देण्यासाठी सातत्याने पाठपुरावा केला.
या प्रयत्नांमुळे शुक्ला कंपाऊंडमधील रहिवाशांना झोपडपट्टी पुनर्विकास प्रकल्पांतर्गत हक्काचे घर मिळण्याचा मार्ग मोकळा झाला आहे. तसेच गाळेधारकांनाही त्यांच्या हक्काचे गाळे मिळण्याची प्रक्रिया सुरू झाली आहे.
या यशस्वी पाठपुराव्याबद्दल आणि हजारो कुटुंबांना बेघर होण्यापासून वाचवल्याबद्दल गोपाळ शेट्टी यांचा सत्कार स्व. गोपीनाथ मुंडे क्रीडांगण, दहिसर (प.) येथे करण्यात आला. हा कार्यक्रम स्व. गोपीनाथ मुंडे यांच्या स्मृतीदिनाचे औचित्य साधून आयोजित करण्यात आला होता.
याच कार्यक्रमात दहिसर परिसरातील मुंबई महानगरपालिकेच्या स्वच्छता कामगारांचाही सन्मान करण्यात आला.
या प्रसंगी भाजपाचे ज्येष्ठ नेते श्रीकांत पांडे, स्थानिक नगरसेवक, पक्षाचे पदाधिकारी, कार्यकर्ते तसेच मोठ्या संख्येने नागरिक उपस्थित होते.
