गोरेगाव मिररमनोरंजनमुंबई
चित्रपटसृष्टीसाठी मोठी बातमी!
दादासाहेब फाळके चित्रनगरीसाठी १४ एकर जमीन; बाह्य चित्रीकरणाला मिळणार गती
-
मुंबई – महाराष्ट्राच्या चित्रपटसृष्टीच्या विकासाला अधिक गती देण्यासाठी राज्य सरकारने एक मोठा आणि महत्त्वपूर्ण निर्णय घेतला आहे. दादासाहेब फाळके चित्रनगरीच्या बाह्य चित्रीकरणासाठी मुंबईतील मानखुर्द येथील सुमारे १४ एकर शासकीय जमीन सांस्कृतिक कार्य विभागाकडे वर्ग करण्यास महसूल विभागाने मान्यता दिली आहे.
मुख्यमंत्री देवेंद्र फडणवीस यांच्या मार्गदर्शनाखाली आणि महसूल मंत्री चंद्रशेखर बावनकुळे यांच्या पुढाकाराने हा निर्णय घेण्यात आला.
मानखुर्द (ता. कुर्ला) येथील सर्व्हे क्र. १३८ मधील आणि लगतची मिळून ५६ हजार ६६६ चौ.मी. (सुमारे १४ एकर) जमीन उपलब्ध करून देण्यात आली.
महाराष्ट्र जमीन महसूल संहिता, १९६६ मधील कलम ४० नुसार ही जमीन महसूलमुक्त आणि भोगाधिकार मूल्यरहित किमतीने देण्यात आली आहे.
चित्रपट, मालिका आणि डिजिटल कंटेंटच्या बाह्य चित्रीकरणासाठी भव्य आणि उत्तम पायाभूत सुविधा उपलब्ध होणार आहेत.”महाराष्ट्राच्या चित्रपटसृष्टीला आवश्यक पायाभूत सुविधा उपलब्ध करून देण्यासाठी शासन कटिबद्ध आहे. दादासाहेब फाळके चित्रनगरीच्या विकासासाठी जमीन उपलब्ध करताना सार्वजनिक हित आणि जमिनीचा नियोजनबद्ध वापर यांचा समतोल साधला असल्याचे महसूल मंत्री चंद्रशेखर बावनकुळे यांनी सांगितले.
