डॉ. हेमराज शाह यांच्या पाठपुराव्याला यश; दहा ज्ञातींचा ओबीसी प्रवर्गात समावेश
मुंबई, दि. (प्रतिनिधी) : विविध समाजघटकांच्या शैक्षणिक आणि सामाजिक सक्षमीकरणासाठी सुरू असलेल्या प्रयत्नांना यश मिळाले असून, दहा ज्ञातींचा इतर मागासवर्गीय (OBC) प्रवर्गात समावेश करण्यात आल्याची माहिती समोर आली आहे. या निर्णयामागे बृहन्मुंबई गुजराती समाजाचे संस्थापक अध्यक्ष डॉ. हेमराजभाई शाह यांच्या सातत्यपूर्ण पाठपुराव्याचा महत्त्वपूर्ण वाटा असल्याचे सांगण्यात येत आहे.
गुजरातमध्ये विविध जातींना ओबीसी प्रवर्गात मान्यता देण्यात आली असली, तरी महाराष्ट्रात काही ज्ञातींच्या समावेशाचा मुद्दा प्रलंबित होता. या पार्श्वभूमीवर संबंधित विषय पुण्यातील खत्री आयोगाकडे सादर करण्यासाठी आवश्यक अर्ज प्रक्रिया करण्यात आली. त्यानंतर डॉ. हेमराज शाह यांनी सातत्याने पाठपुरावा करत पुणे व मुंबईदरम्यान प्रवास करून संबंधित यंत्रणांकडे निवेदने सादर केली.
त्यांच्या प्रयत्नांची दखल घेत राज्य मंत्रिमंडळाने या प्रस्तावाला मंजुरी दिल्याचे सांगितले जाते. या निर्णयानुसार गुजराती कडिया, लुहार, सुथार, मिस्त्री, नावी/हज्जाम, दर्जी, घांची, परजिया सोनी, लोहार, पंचाल, सुथार आणि मणियार अशा दहा ज्ञातींचा ओबीसी प्रवर्गात समावेश करण्यात आला आहे.
या निर्णयामुळे संबंधित समाजघटकांतील विद्यार्थ्यांना शिक्षण, रोजगार आणि शासकीय योजनांमध्ये आरक्षणाचा लाभ मिळणार असून, अनेक युवक-युवतींच्या उच्च शिक्षण व व्यावसायिक क्षेत्रातील संधी वाढणार असल्याचे मत व्यक्त करण्यात येत आहे.
डॉ. हेमराज शाह यांच्या मते, या निर्णयामुळे हजारो विद्यार्थ्यांना लाभ मिळून त्यांचे डॉक्टर, अभियंता आणि इतर व्यावसायिक होण्याचे स्वप्न साकार होण्यास मदत होईल. समाजातील अनेक घटकांनी या प्रयत्नांचे स्वागत केले असून, त्यांच्या सातत्यपूर्ण कार्याचे कौतुक करण्यात येत आहे.
