रत्नागिरी,दि.२५:कावळा म्हटलं की काळ्या रंगाचा कावळा आपल्या डोळ्यांसमोर लगेचच येतो.पण कावळा सफेदही असतो असं कुणी म्हटलं तर विश्वास बसत नाही. पण असाच एक पांढरा सफेद कावळा रत्नागिरीपासून जवळ असलेल्या काळबादेवी गावात शेट्येवाडीत आढळला आहे.
शेखर शेट्ये यांनी या कावळ्या चे निरीक्षण करुन ही बातमी फोटोज व व्हीडीओद्वारे सगळीकडे पाठवली. गेले चार दिवस शेट्ये यांच्या घराजवळ पांढऱ्या कावळ्याची हजेरी हा चर्चेचा विषय ठरला आहे.काळबादेवी येथील शेखर शेट्ये यांच्या घराजवळ अनेक पक्षी परिसरातील झाडांवर आढळतात. चार दिवसांपूर्वी श्री. शेट्ये घराच्या बाजूला असलेल्या कोंबड्यांना खाणं घालत असताना काही कावळे तिथे आले. त्यात एक पांढरा पक्षी दिसला. दाणे टिपणारा तो पक्षी कबुतर असावे असे वाटले. कुतूहलाने त्यांनी त्याचे निरीक्षण केल्यावर तो कावळाच वाटला. त्या पांढऱ्या पक्षाची ठेवण, चोच आणि डोळा हा नेहमीच्या कावळ्या सारखाच होता. थोडावेळ थांबून त्यांनी आवाज ऐकला तर तो कावळ्याचाच होता.
शेखर यांनी पांढऱ्या कावळ्याची गोष्ट शेजारच्यांना सांगितली.सर्वच जणं त्याला पहायला आले. काहींनी छायाचित्रे काढून सोशल मीडियावरही शेअर केली. त्यामुळे हा पांढरा कावळा आता येथे चर्चेचा विषय झाला आहे
